NHSJobs.com

Trosolwg o'r swydd

Mae Iechyd a Gofal Digidol Cymru (IGDC) yn sefydliad newydd ac uchelgeisiol. Fe’i crëwyd gan Lywodraeth Cymru i arwain ar drawsnewid gwasanaethau iechyd a gofal digidol ledled Cymru, gan ddarparu model gwasanaeth digidol yn gyntaf ar gyfer yr 21ain ganrif. Mae datblygiadau ar raddfa fawr a fydd yn gwneud gwahaniaeth sylweddol i bobl Cymru yn cynnwys ehangu'r cofnod cleifion digidol a Chymru yn arwain y ffordd drwy greu adnodd data cenedlaethol arloesol, a fydd yn gwella'r ffordd y caiff data eu casglu, eu rhannu a'u defnyddio.  

Mae'r sefydliad newydd hwn yn adeiladu ar y bensaernïaeth ddigidol a'r gwasanaethau cenedlaethol a roddwyd ar waith gan Wasanaeth Gwybodeg GIG Cymru dros y degawd diwethaf ac mae'n cydnabod rôl hanfodol digidol a data mewn gofal modern. Erbyn 2025, nod Iechyd a Gofal Digidol Cymru yw dod yn esiampl ryngwladol ar gyfer digideiddio iechyd a gofal.  

Bydd y rôl hon yn gyfrifol am ddarparu cymorth busnes gweinyddol cynhwysfawr a chyfrinachol i'r Tîm Gofal Sylfaenol. Bydd yn cyfathrebu ac yn cysylltu â Chyfarwyddiaethau, Is-adrannau a Rhanddeiliaid i greu gwaith o fewn terfynau amser tra'n sicrhau cydymffurfiaeth â pholisïau sefydliadol.  Mae'r rôl hon yn allweddol er mwyn galluogi’r Tîm Gwasanaethau Gofal Sylfaenol i redeg yn effeithiol. 

Mae’r swydd hon yn un cyfnod penodol hyd at 31 Mawrth 2026 ar gyfer secondiad

Prif ddyletswyddau'r swydd

Sefydlu a chynnal cyfathrebu dwy ffordd effeithiol yn ysgrifenedig ac ar lafar gydag unigolion a grwpiau o Randdeiliaid yn unol â chyfarwyddyd y Rheolwr Llinell. 

Derbyn a phrosesu gwybodaeth gymhleth a sensitif gan ganfod pwy fyddai’r derbynnydd mwyaf priodol a sicrhau bod camau priodol yn cael eu cymryd. 

Rheoli terfynau amser a thasgau yn effeithiol a darparu gwybodaeth mewn da bryd. Ymateb i Randdeiliad Gofal Sylfaenol, lle bo angen. Darparu cymorth gweinyddol cynhwysfawr i'r Tîm Gofal Sylfaenol gan sicrhau bod cyfathrebu clir a chryno rhwng Cyfarwyddiaethau, Is-adrannau a Rhanddeiliaid. 

Creu a chynnal rhestrau dosbarthu mewnol ac allanol. Darparu cymorth gweinyddol lefel uchel yn ôl yr angen i'r Tîm Gofal sylfaenol. Bydd hyn fel arfer yn cynnwys trefnu cyfarfodydd a chyfleusterau ynghyd â pharatoi a dosbarthu agendâu a phapurau a chofnodion. 

Creu cofnodion cyfarfodydd a nodi materion i’w trafod a’u trawsgrifio.  Trefnu apwyntiadau ar ran adrannau a chwmnïau mewnol, allanol a thrydydd parti. 

Bydd gofyn defnyddio eich crebwyll eich hun i wneud hyn gan ddefnyddio'r wybodaeth sydd ar gael a rhoi dadansoddiad ar gyfer dehongli a chymharu. Creu, rheoli a chynnal systemau gwybodaeth i gofnodi ac adrodd ar weithgarwch Gofal Sylfaenol yn gywir. Bydd angen sicrhau bod yr wybodaeth yn cael ei storio’n briodol ac yn ddiogel, yn unol â pholisi’r sefydliad.

Gweithio i'n sefydliad

Mae Iechyd a Gofal Digidol Cymru (DHCW) yn rhan o deulu GIG Cymru ac mae ganddo rôl bwysig wrth newid y ffordd y darperir gwasanaethau iechyd a gofal trwy dechnoleg a data. Mae’r sefydliad yn cefnogi staff rheng flaen gyda systemau modern a mynediad at wybodaeth bwysig am eu cleifion, wrth rymuso pobl Cymru i reoli eu hiechyd eu hunain trwy wasanaethau digidol GIG Cymru.

Mae gweithio i DHCW yn cynnig llawer o fuddion i weithwyr, gan gynnwys gweithio hyblyg, cyflog cystadleuol, 28 diwrnod o wyliau blynyddol yn ogystal â gwyliau banc a chyfleoedd i ddatblygu gyrfa. Rydym wedi ymrwymo i gydnabod a dathlu ein staff fel y rhan fwyaf gwerthfawr o’n sefydliad.

Ymunwch â'n tîm trawsnewidiol sy’n achub bywydau a dechrau gwneud gwahaniaeth go iawn i wasanaethau iechyd a gofal yng Nghymru.