NHSJobs.com

Trosolwg o'r swydd

NODER MAI DIM OND CEISIADAU GAN STAFF A GYFLOGIR GAN GIG CYMRU AR HYN O BRYD Y BYDDWN YN EU DERBYN.

Rhoddwyd Rhaglen Sgrinio Ymlediadau Aortig Abdomenol Cymru (WAAASP) ar waith ar 1 Mai 2013 a’i nod yw haneru’r marwolaethau sy’n gysylltiedig ag ymlediad aortig abdomenol yn y boblogaeth gymwys erbyn 2025, hynny yw dynion 65 oed sy’n byw yng Nghymru.

Mae cyfle cyffrous wedi codi i Gydlynydd Nyrsio Rhanbarthol ymuno â WAAASP am gyfnod penodol o 12 mis neu drefniant secondiad.

Mae hon yn swydd 37.5 awr yr wythnos yn seiliedig ar weithio 5 diwrnod  o ddydd Llun i ddydd Gwener. Bydd yr oriau yn hyblyg o fewn oriau craidd 8:00am - 6:00PM.

Fel Cydlynydd Rhanbarthol byddwch yn cyflawni rôl allweddol wrth ddarparu WAAASP.  Mae’r dynion a wahoddir yn cael cynnig sgan uwchsain aortig abdomenol untro mewn safle sgrinio cymunedol. Caiff y sganiau uwchsain eu cwblhau gan sgrinwyr WAAASP hyfforddedig

Prif ddiben y rôl hon yw arwain gweithredu polisïau, safonau, protocolau a rheoli perfformiad sgrinwyr WAAASP.

Bydd angen i ddeiliad y swydd fod yn rheolwr nyrsio profiadol a bydd yn gyfrifol am arwain a rheoli’r Uwch Sgriniwr Rhanbarthol a darparu cymorth rheoli a goruchwyliaeth glinigol ar gyfer sgrinwyr WAAASP.

Prif ddyletswyddau'r swydd

Bydd deiliad y swydd yn cysylltu â'r tîm gweinyddol lleol i sicrhau bod clinigau'n cael eu dyrannu'n briodol a bod prosesau gwahodd, galw ac ailalw a gwyliadwriaeth yn cael eu dilyn. Bydd angen i ddeiliad y swydd hefyd gael hyfforddiant i ddod yn gymwys mewn sgrinio a disgwylir iddo gefnogi staff sgrinio newydd drwy eu rhaglen hyfforddi unwaith y bydd yn gymwys.

Bydd y swydd wedi'i lleoli mewn swyddfa yng Ngorllewin Cymru yn Nhŷ Matrix yn Abertawe. Bydd disgwyl i ddeiliad y swydd gyflenwi dros dro ar gyfer staff WAAASP ar y ddau safle a chymorth clinigol achlysurol i bob rhanbarth ledled Cymru, y gellir ei wneud o bell.  Efallai y bydd gofyniad achlysurol i weithio'n hwyrach neu ar benwythnos ond nid fel mater o drefn.

Mae dealltwriaeth dda o weithio gyda chyfranogwyr a chyfrinachedd y cyfranogwr yn hanfodol ar gyfer y rôl hon, yn ogystal â sgiliau trefnu da, gwybodaeth am wella’n barhaus, profiad o arwain a rheoli staff a’r gallu i weithio’n fanwl gywir o dan bwysau ac ar eich menter eich hun.

MAE’R SWYDD HON AM GYFNOD PENODOL/SECONDIAD AM 12 MIS OHERWYDD CYLLIDO.

OS OES DIDDORDEB GYDA CHI MEWN CEISIO AM SWYDD SECONDIAD, MAE’N RHAID I CHI GAEL CANIATAD EICH RHEOLWR LLINELL PRESENNOL CYN I CHI GEISIO AM Y SWYDD HON.

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)