Trosolwg o'r swydd

Os ydych yn unigolyn dynamig sy'n mwynhau her ac yn dymuno ymuno â thîm sy'n teimlo'n angerddol i ddarparu gofal o ansawdd uchel i gleifion allanol, rydym am glywed wrthoch. Rydym yn dîm bach sy’n darparu clinigau cymunedol dan arweiniad nyrsys, yn ogystal â chymorth i wahanol glinigau traddodiadol dan arweiniad Meddygon Ymgynghorol ledled Canolfannau Gofal Integredig Aberaeron ac Aberteifi. Bydd gofyniad hefyd i ddarparu clinig cymunedol achlysurol yn Nhregaron.

Mae gwasanaethau Cleifion Allanol yn cynnig amrywiaeth o arbenigeddau i nyrsys feithrin ac atgyfnerthu sgiliau a phrofiad clinigol, a gallant fod yn fan cychwyn da i lywio eich gyrfa neu i gael cyfleoedd i archwilio rolau arbenigol yn y dyfodol mewn arbenigeddau clinigol, a hynny trwy amlygiad clinigol uniongyrchol.

Bydd gofyn i ddarpar ymgeiswyr fod â phrofiad diweddar o weithio yn system gofal iechyd y GIG, a byddai profiad blaenorol o nyrsio cleifion allanol yn fanteisiol, ond nid yw'n angenrheidiol. Bydd hyfforddiant yn cael ei ddarparu i'r ymgeiswyr llwyddiannus i alluogi arferion gwaith effeithiol i gefnogi profiad y claf a'i ddiogelwch, ac i'ch galluogi i fod yn 
ymarferwyr annibynnol yn ein clinigau microsugno clustiau, Treial Heb Gatheter, a’n clinigau newid cathetr rheolaidd dan arweiniad nyrsys. Os byddwch yn llwyddiannus byddwch hefyd yn rhan o dîm sy'n datblygu sgiliau i ddarparu triniaethau dydd ar gyfer amrywiaeth eang o anghenion gofal yn y dyfodol.

Prif ddyletswyddau'r swydd

Mae Cleifion Allanol yn amgylchedd amrywiol, amlddisgyblaethol sy'n gofyn am sgiliau hyblyg y gellir eu haddasu, y gallu i ddysgu, a'r cymhelliant i ddatblygu eich sgiliau eich hun. Rydym yn ymdrin ag ystod eang o arbenigeddau, gan gynnwys clinigau Fasgwlaidd, Offthalmoleg, Orthopaedeg, Dermatoleg a Chlust, Trwyn a Gwddf.

Bydd yr ymgeisydd llwyddiannus yn frwdfrydig, yn drefnus, ac yn ymroddedig i ddarparu gofal nyrsio o safon uchel, ac yn gallu gweithio’n annibynnol yn ogystal ag yn rhan o dîm. Byddwch yn sicrhau'n gyson bod preifatrwydd, urddas a lles seicolegol claf yn cael eu cynnal bob amser a bod y gofal a roddir yn canolbwyntio ar y claf. Mae angen i chi feddu ar sgiliau cyfathrebu a rhyngbersonol rhagorol. Mae arnom angen unigolion sy'n flaengar, yn drefnus, ac sy'n meddu ar agwedd gadarnhaol tuag at hyblygrwydd a newid.

Rydym yn adran ragweithiol ac yn cefnogi myfyrwyr meddygol, myfyrwyr nyrsio, prentisiaid, lleoliadau gwaith a datblygiad gweithiwr cymorth gofal iechyd. O fod yn nyrs gymwys yn yr adran, byddwch hefyd yn gweithredu fel Asesydd Ymarfer a/neu Oruchwyliwr Ymarfer. Rydym yn cydnabod pwysigrwydd addysg o ran cynnal gweithlu cynaliadwy, ac yn disgwyl i’n staff arwain trwy esiampl i ysbrydoli cenhedlaeth gweithlu’r dyfodol.

Mae'r gallu i siarad Cymraeg yn ddymunol ar gyfer y swydd hon; mae croeso i siaradwyr Cymraeg a/neu Saesneg, fel ei gilydd, wneud cais.

Cynhelir y cyfweliadau ar 14/04/2025.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu i bron 400,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

4 prif ysbyty (Bronglais, Aberystwyth, Glangwili, Caerfyrddin, Tywysog Philip, Llanelli, ac Llwynhelyg, Hwlffordd).

5 ysbyty cymunedol (Ysbyty Dyffryn Aman ac Ysbyty Llanymddyfri yn Sir Gaerfyrddin, Ysbyty Tregaron yng Ngheredigion,Ysbyty Dinbych-y-pysgod a Chanolfan Adnoddau Iechyd a Gofal Cymdeithasol De Sir Benfro yn Sir Benfro.

Dwy ganolfan gofal integredig (Aberaeron ac Aberteifi, yng Ngheredigion).

Cyfleusterau cymunedol, gan gynnwys:

48 Meddygfa, 49 Deintyddfa, 98 Fferyllfa Gymunedol, 44 Practis Offthalmig Cyffredinol (gan gynnwys gwasanaethau iechyd llygaid a golwg gwan), 38 safle yn darparu gwasanaethau iechyd meddwl ac anableddau dysgu, gofal o fewn eich cartrefi eich hun

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.