Trosolwg o'r swydd

Bwrdd Iechyd Prifysgol Hywel Dda yw sefydliad lleol y Gwasanaeth Iechyd Gwladol yng nghanolbarth a gorllewin Cymru. 

Fel bwrdd iechyd, rydym yn cynllunio, yn trefnu ac yn darparu gwasanaethau iechyd ar gyfer bron 400,000 o bobl ledled Sir Gaerfyrddin, Ceredigion, a Sir Benfro. Rydym yn rheoli ac yn talu am y gofal a’r driniaeth a ddarperir i bobl yn yr ardal hon ar gyfer iechyd corfforol, iechyd meddwl ac anableddau dysgu. 

Mae ein strategaeth uchelgeisiol yn ceisio datblygu a gweithredu proses i drawsnewid y ffordd y darparwn wasanaethau gofal iechyd, trwy ymrwymiad i symud o system sy’n canolbwyntio ar driniaeth a diagnosis i un lle mae atal afiechyd yn weithgaredd craidd a lle mae llesiant pobl yn cael ei gymryd i ystyriaeth. Mae ein Model Cymdeithasol ar gyfer Iechyd a Llesiant, fel y’i gelwir, yn rhan ganolog o’n strategaeth 10 mlynedd.

I wireddu’r uchelgais hwn, ni allwn weithio ar ein pennau ein hunain. Rydym yn cydnabod pwysigrwydd gweithio mewn partneriaeth ag awdurdodau lleol, sefydliadau cymunedol, busnesau a chymunedau i wella nid yn unig y gwasanaethau a ddarparwn ond hefyd yr amgylchiadau lle’r ydym yn tyfu i fyny, yn byw, yn gweithio, yn chwarae ac yn heneiddio’n dda. 

Mae’r tair blynedd diwethaf wedi dangos yn glir bwysigrwydd y perthnasoedd hyn. Allan o adfyd, mae’r cysylltiadau hyn wedi ffynnu, wrth i bartneriaethau presennol gael eu cryfhau a rhai newydd gael eu creu ar draws sectorau, i reoli effaith uniongyrchol a thymor hwy y pandemig. 

Prif ddyletswyddau'r swydd

Fel y Cyfarwyddwr Nyrsio, Ansawdd a Phrofiad y Claf, byddwn yn disgwyl i chi arwain ein gweledigaeth strategol gyda’r timau nyrsio a bydwreigiaeth i’n galluogi i ddatblygu’r cyfleoedd hyn ymhellach a hyrwyddo ein huchelgeisiau ar gyfer poblogaeth iachach a hapusach, y mae ei llesiant yn rhan ganolog o’n meddylfryd. 

Rhaid i chi fod yn arweinydd ysbrydoledig, creadigol a gweladwy sy’n hyrwyddo buddiannau defnyddwyr gwasanaeth a gofalwyr.  Fel arweinydd nyrsio profiadol sy’n gweithio ar lefel gorfforaethol neu’n agos at lefel y Bwrdd, byddwch yn dod â gweledigaeth a hygrededd i’r rôl.  Byddwch yn gyfforddus wrth feithrin perthnasoedd ag ystod eang o randdeiliaid yn y sefydliad, yn ein system iechyd ehangach ac yn ein cymunedau a bydd eich diddordeb angerddol mewn arweinyddiaeth broffesiynol a chlinigol yn cyd-fynd ag egni a brwdfrydedd ein gweithlu nyrsio a bydwreigiaeth arloesol, ymroddedig. Afraid dweud bod rhaid hefyd i chi fod wedi’ch cofrestru â’r Cyngor Nyrsio a Bydwreigiaeth.

Os tybiwch mai hon yw’r rôl i chi ac mai chi yw’r sawl a ddisgrifir uchod, byddem wrth ein boddau yn clywed gennych. Rydym wedi cynnwys pecyn ymgeisydd sy’n cynnwys rhagor o wybodaeth am ein Bwrdd Iechyd a’r rôl hon ac os hoffech drafod y rôl, byddai Phil Kloer, ein Brif Weithredwr yn falch iawn o siarad â chi.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 11,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu ar gyfer tua 384,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

Pedwar prif ysbyty: Ysbyty Cyffredinol Bronglais yn Aberystwyth, Ysbyty Cyffredinol Glangwili yng Nghaerfyrddin, Ysbyty Tywysog Philip yn Llanelli a Ysbyty Cyffredinol Llwynhelyg yn Hwlffordd;

Saith ysbyty cymunedol: Dyffryn Aman a Llanymddyfri yn Sir Gaerfyrddin; Tregaron, Aberaeron ac Aberteifi yng Ngheredigion; a Chanolfan Adnoddau Iechyd a Gofal Cymdeithasol Ysbyty Dinbych-y-pysgod a De Sir Benfro yn Sir Benfro;

48 o bractisau cyffredinol (chwech ohonynt yn bractisau a reolir), 47 practis deintyddol (gan gynnwys tri orthodontig), 99 o fferyllfeydd cymunedol, 44 o bractisau offthalmig cyffredinol (43 yn darparu Archwiliad Iechyd Llygaid Cymru a 34 o wasanaethau golwg gwan) ac 17 o ddarparwyr gofal cartref yn unig ac 11 canolfannau iechyd;

Lleoliadau niferus yn darparu gwasanaethau iechyd meddwl ac anableddau dysgu;

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.