Trosolwg o'r swydd

Mae'r swydd hon ar gyfer Haematolegydd Ymgynghorol sydd ag arbenigedd ym maes anhwylderau gwaedu etifeddol a chlotiau gwaed a bydd yn cyfrannu at ddarparu gwasanaethau Haematoleg cynhwysfawr a hygyrch ledled Gogledd Cymru. Mae elfennau allweddol gofal Haematoleg BIPBC yn cynnwys darparu gwasanaethau mor agos ag y bo modd at gartrefi cleifion ac ehangu'r opsiynau o ran triniaethau sydd ar gael i gleifion yn lleol ledled Gogledd Cymru.
Bydd disgwyl i ddeilydd y swydd ddarparu gwasanaeth clinigol a labordai
cynhwysfawr ar y cyd â’r Haematolegwyr ymgynghorol eraill. Mae hyn yn
cynnwys ymrwymiad cylchdro i’r gwasanaeth cleifion mewnol, clinigau
cyffredinol ac arbenigol wythnosol i weld cleifion allanol, ymrwymiadau yn ymwneud ag achosion dydd, wardiau a chleifion a gyfeirir gan feddygon teulu ac ymrwymiadau diagnostig arferol yn y labordai.
Disgwylir i ddeilydd y swydd reoli’r ystod lawn o anhwylderau haematoleg glinigol yn cynnwys cleifion sydd â lewcemia yn ogystal ag anhwylderau ceulo etifeddol a rhai a gaiff eu caffael;. Ceir nyrsys sy’n arbenigo ym meysydd  thrombosis, hemoffilia a haematoleg i gynorthwyo â’r gwasanaethau hyn.
Disgwylir i ddeilydd y swydd gyfranogi yn y rota ar alwad (mae’r rota ar alwad yn 1:8 yn achos Gwasanaeth Haematoleg Gogledd Cymru gyfan).

Prif ddyletswyddau'r swydd

Darparu gwasanaethau oncolegol arbenigol i'r boblogaeth a wasanaethir, yn arbennig ynghylch y canserau cyffredin a'r isarbenigeddau priodol cytunedig, a chyfranogi'n weithgar yng ngwaith pob un o'r timau amlddisgyblaethol hyn.

Datblygu arbenigedd safle a diddordeb ymchwil yn y ddau ysbyty. Bydd hyn yn cynnwys datblygu ymchwil glinigol a chynnwys cleifion mewn astudiaethau cenedlaethol a rhyngwladol priodol.

Darparu rownd ward wythnosol i gyflenwi i ddarparu gwasanaethau ar gyfer cleifion mewnol.

Cydweithio'n agos â chydweithwyr sy'n feddygon ymgynghorol clinigol a darparu gofal haematolegol di-dor i bob claf.

Cydweithio'n agos â chydweithwyr mewn Uwch Adrannau eraill i gynorthwyo i ddarparu gwasanaeth effeithlon i gleifion sy'n trosglwyddo rhwng y gwahanol ddisgyblaethau ac yn ystod taith cleifion.

Ymgysylltu â chydweithwyr ym meysydd Haematoleg, Oncoleg a Gofal Lliniarol i gyflenwi er mwyn darparu gofal i gleifion haematoleg.

Datblygu blaengareddau cydweithredol a chyfranogi ynddynt, gan roi sylw manwl i effeithiolrwydd clinigol ac arferion meddygaeth sy'n seiliedig ar dystiolaeth.

Cyfrannu at waith archwilio ac addysgu.

Bod yn gyfrifol am sicrhau cyfranogiad gweithredol mewn addysg feddygol barhaus (CME). 

Gweithio i'n sefydliad

Bwrdd Iechyd Prifysgol Betsi Cadwaladr yw'r sefydliad iechyd mwyaf yng Nghymru, gan ddarparu amrywiaeth lawn o wasanaethau sylfaenol, cymunedol, iechyd meddwl ac ysbyty acíwt i boblogaeth o tua 676,000 o bobl ledled chwe sir Gogledd Cymru (Ynys Môn, Gwynedd, Conwy, Sir Ddinbych, Sir y Fflint a Wrecsam). Caiff rhai ardaloedd yng Nghanolbarth Cymru, Swydd Gaer a Swydd Amwythig eu cwmpasu gan y Bwrdd Iechyd hefyd.

Mae'r Bwrdd Iechyd yn cyflogi tua 16,500 o staff ac mae ganddo gyllideb o tua £1.4 biliwn. Mae'n gyfrifol am redeg tri ysbyty cyffredinol dosbarth (Ysbyty Maelor Wrecsam yn Wrecsam, Ysbyty Glan Clwyd ger y Rhyl ac Ysbyty Gwynedd ym Mangor), yn ogystal â 22 o ysbytai acíwt a chymunedol eraill a rhwydwaith o fwy na 90 o ganolfannau iechyd, clinigau, timau iechyd cymunedol ac unedau iechyd meddwl. Mae'r Bwrdd Iechyd hefyd yn cydlynu gwaith 121 o bractisau meddygon teulu a gwasanaethau'r GIG a ddarperir yn y gogledd gan ddeintyddion, optegwyr a fferyllfeydd.

Mae'r Bwrdd Iechyd yn ardal fwyaf gogleddol Cymru, ger Parc Cenedlaethol prydferth Eryri ac mae'n ymestyn dros ardal ddaearyddol enfawr ac amrywiol. Mae'r morlin yng Ngogledd Cymru ymhlith y rhai mwyaf amrywiol ac ysblennydd yn y DU, gan gynnig cyfleoedd heb eu hail i gymryd rhan mewn gweithgareddau awyr agored mewn ardal o harddwch naturiol eithriadol.